أم لأجمل طفلين شكراً لله 🙏 وموظفة في إحدى شركات قطاع الأعمال العام في مجال خدمة العملاء والمبيعات من أكتر من 15 سنة، خريجة كلية تجارة قسم اللغة الإنجليزية من جامعة المنصورة ومن اول مااتخرجت من الجامعة وأنا بحاول أدورعلى شغل او وظيفة وطبعاً كان من أهم أحلامي إني أشتغل في وظيفة حكومية لأنها كانت الأمان زي ماكان أهلي والناس بيقولولي وفضلت 4 سنوات بعد التخرج اشتغل في القطاع الخاص , اشتغلت كل حاجة سكرتيرة في مكتب عقارات - محاسبة في مصنع أثاث - شغل استيراد وتصدير ومراسلة عملاء أجانب-ووظائف في التسويق والمبيعات وكنت بشتغل وبدرس مش كنت ببطل بعتبر التعلم ده شيء في دمي ولحد دلوقت مش ببطل تعلم - كان كل ماتنزل منحة من الوزارات او الهيئات أدخل فيها - أي كورس أقدر اشتريه بشتريه وكنت بشتري كتب كتير ,كانت أول منحة أخدتها من وزارة الإتصالات في برمجة وتطوير مواقع الإنترنت والتجارة الإلكترونية وكانت منحة لمدة كبيرة 9 شهور تقريباً في بلد بعيدة عن بلدي وكنت بسافر طول الفترة دي وانا مبسوطة جداً, وبعد ماخلصتها اشتغلت في شركة تطوير مواقع وبعدها جتلي الوظيفة الحكومية بس كانت طبعاً بعد محاولات كتير جداً في القطاع الحكومي في أماكن كتير كنت بقدم أكتر من مرة وكان عندي إصرار غريب على الوظيفة الحكومية 😁

من أول ما بدأت اشتغل موظفة بدأت اعتمد على الوظيفة في أنها خلاص هي دي اللي هستمر فيها طول عمري ولقيت إن الوظائف الحكومية عموماً التطوير فيها بطيء وغير إنك مش بتبقى حر نفسك لأنك ملتزم بقرارات مديرين ونظام عام للمنظمة وده كان صعب عليا وأحبطني لأني شخص حر وبحب التجديد والتغيير حتى في الشغل مش بحب التقيد والروتين .

بس كانت أكتر حاجه لمست فيها شغفي في الوظيفة هي خدمة العملاء والإحتكاك بالناس!👥

كانوا زمايلي يستغربوا لما اقولهم إن دي أكتر حاجة بحبها في وظيفتي ويقولولي انتي عارفة إن الشغل مع الناس متعب وغير المشاكل اللى ممكن العميل يعملها لو عنده مشكلة مع الخدمة او المنظمة ويطلعها عليك كموظف , وكنت اقولهم انا بحب الناس , بحب اتكلم مع الناس , بحب اسمع حكاويهم , بحب اني اشوف حد ساعدته او بِعت له حاجة هو عاوزها بجد وهتفيده , كان بيبقى يومي كله حلو لما الاقي عميل خارج من عندي مشكلته محلولة ومبتسم وبيدعيلي.

كانت الناس عرفتني بالإسم وبيسألوا عليا لما بغيب ولما اتجوزت وخلفت كانوا بيسألوا عليا وبيتصلوا بيا كمان!

دي كانت أكتر حاجة بعتبرها الحاجة المهمة اللى طلعت بيها من وظيفتي وهي حب الناس ❤️

لما خلفت أولادي قعدت في البيت أجازات طويلة علشانهم وبدأ من هنا شغفي يظهر ولقيت مجال اللايف كوتشنج الروحاني بينده عليا
🥰

هو اللي اختارني الأول وبقيت بسمع فيديوهات مش عارفه بتطلعلي منين وأدرس حاجات وكل ماأخلص حاجة اقول هو أنا ايه اللي جابني هنا؟؟

هو ايه الطريق اللي رايحاله ده وانا مش عارفه لسه ايه الغرض ولا الرسالة من كل ده!

أتعرضت لفترة كبيرة موجعة في حياتي خلت كل حياتي تنهار وكل حاجة كانت بتروح مني ولقيتني فجأة لواحدي مع اولادي!

لوحدي حرفياً , بدأت الأسئلة تنزل زي البرق على عقلي وأسأل واقول انا ليه كل ده بيحصلي ؟؟

ولكني كنت مازلت ماشية في نفس الطريق ولقيتني بدرس أكتر وبتعلم أكتر وباخد شهادات كمان فيه وبقول انا هستمر لحد مااعرف انا رايحة فين ؟

وبعد فترة طويلة معاناة مع الوحدة والمشاكل المادية والظروف القاسية عليا أنا وأولادي بدأت حاجات كتير تتغير وبدأ الطريق يوضح وبدأت لأول مرة في حياتي أعرف أنا عاوزة ايه!!

ايوة انا عاوزه اساعد الناس وبحب ده وهفضل مستمرة في ده لأن ده شيء من جوايا بيسعدني ومساعدتي للناس كنت عاوزاها تبقى بشكل حقيقي ومفيد ليا وليهم.

عملت جروب إسمه صحوة توأم الشعلة وكنت بساعد ناس كتير بشكل مجاني في استشارات وبدأت اتعرف على معاناة الناس واوجاعهم وخاصة اوجاعهم العاطفية وتجارب علاقاتهم المؤذية واللي اثرت على حياتهم كلها وعلى واقعهم.

كان عندي فرصة كبيرة استغل الناس وأأخذ منهم اللي عاوزاه في مقابل إني أوهمهم وأبيعلهم حاجات غير حقيقية وأنا لسه حاسة إني من جوايا مش متشافية ومش قادرة أساعد نفسي على تجاوزها.

وعلشان كده قلت اني لازم اكون انا الأول متشافية ومتصالحة مع نفسي ومطبقة اللى هطبقه عليهم علشان مااكونش من اللى ربنا قال عليهم ( لمَ تقولون مالاتفعلون).

وعلشان كده قلت انا هدرس أكتر وهتطور وهقرأ واتعلم واطبق لحد مااكون فعلا لايف كوتش اقدر اساعد غيري بالتجربة والعلم سوا.

ولحد دلوقت انا بعمل ده والحمد لله بلمس نتائج كويسة على الناس اللى بساعدهم لأني بقيت عارفة الطريق أخره ايه ومؤمنة ومتيقنة بده وإن ربنا لما بيبعتلنا إشارات وإرشادات بيكون عندنا خيارين مافيش ثالث ياتقول آمنا وتمشي ورا الرسالة اللي بعتهالك ربنا ياتبعد وتقول أنا خايف!

والحمد لله رب العالمين دائماً ادعو الله إني أكون من الذين يحسنون صنعاً في الأرض وأكون من النافعين والمصلحين.

لايف كوتش هدير رضا